ఫ్రీ రిజర్వేషన్

ఆ బండిలో
అందరికీ బెర్తులు ఫ్రీనే
ముందే..మీరడక్కుండానే
రిజర్వు అయిపోతాయి
ఎవరికివారు చేసుకోనక్కరలేని
రిజర్వేషను ఇదొక్కటే
అప్పుడప్పుడు తత్కాల్ ఆఫర్
కూడా వుంటుంది
బెర్తులు బానే ఉంటాయండోయ్
ఎంచక్కా పూలుచల్లబడి
అత్తరు పూయబడి
అగరొత్తుల పరిమళమద్దబడి
ఆ మాత్రం సోకు ఉండొద్దూ
బండిపేరు
మరణం మరి!

అందని తీరం

తీరంలో నిలబడి నీవు
కనపడుతూనే ఉన్నావు
పయనం నీవైపే అయినా
ఎందుకో..
ఈదినకొద్దీ
పెరుగుతోంది
దూరం !
ఈదిఈది అలసిన మనసు
ఆలోచనలో పడింది
కారణమేమయి ఉంటుందని
స్థిమితపడి చూస్తే
తెలిసొచ్చింది
అత్యాశదని
లోపం!