అవినీతిపై కార్టూన్లు


మనసు కుసుమం


















జీవనవని లో పూచిన
చిన్ని కుసుమమీ మనసు


పూలూ ముళ్లెన్నో
స్నేహహస్తం చాచినా
రంగులూ రాళ్లెన్నో
రారమ్మని పిలిచినా
తుషార మోవియై
చిద్విలాసమే సమాధానమై
జాగృతయై నిలుచునే
గానీ జారిపోదు


ఋతువులెన్నొ మారినా
వసంతమిచ్చిన
అనుభవాల కధలెన్నొ
కదలాడి కదిల్చినా
కాలమెంత గడిచినా
కనుమరుగవని
జ్ఙాపకాల వ్యధలెన్నొ
వెంటాడి వేధించినా
ధృఢమై విరియునే
గానీ జడం కాదు


వంటి నిండా కళ్లుఐ
కంటి నిండా మెరుపై
స్వామి సన్నిధి లక్ష్యమై
పరవశంతొ పరిమళించు
ఆశలవనిలో పూచిన
చిన్ని కుసుమమీ మనసు

నాకు నచ్చిన వ్యక్తులు




అవినీతి నిర్మూలన లక్ష్యంగాజన్ లోక్ పాల్ ధ్యేయంగా
మెరుపులా కదలిపోతున్న హజారే !
మేమంతా కలిసినడుస్తాం నీవెనుకే !


దేశాన్ని
అవినీతి
చెరనుంచి
విడిపించడానికి
కదలివచ్చిన
అన్నా హజారేకి
నమస్కారములతో..
అంకితం !

దేశద్రోహులు

ఎవరికి ఓటేశావ్?
మనసున్న మంచివాడికా?
కాదు...కాదు...
చదువున్న సంస్కారికా?
అదేం కాదు...
బాధ్యతున్న దేశభక్తుడికా?
అస్సలు కాదు...
సంఘమంటే అతనికవగాహన ఉందా?
ఏమో తెలీదు...
దేశాబ్యుదయమే అతని ఆశయమా?
కాదనుకుంటా...

మరి..ఏం తెలిసి అతనికోటేశావ్?
ఏంకోరి దేశాన్నతని చేతిలో పెట్టావ్?
అదేమీ ఆలోచించలేదా?

అవగాహనలేని, బాధ్యత లేని
తెలివిమాలిన... ఓటరువి నువ్వు!
నోట్లు పంచి ఓట్లు దండే దమ్మున్న
తెలివిమీరిన... నాయకుడు అతను!
అందుకే..ఇద్దరూ దేశద్రోహులే!!

....ప్రేమ....

స్వఛ్ఛమైన నది ప్రేమ
ఏ మలినం అంటనిది!


శ్రేష్ఠమైన తరువు ప్రేమ
ఏ స్వార్ధం కోరనిది!


విస్తృతమైన వెన్నెల... ప్రేమ
ఏ తాపములెరుగనిది !

ఉధృతమైన సంద్రం... ప్రేమ
ఏ ధాటికి చెదరనిది!

అద్భుతమైన నిధి... ప్రేమ
ఏ చోరులకగుపడనిది !

అందమైన పాపాయి... ప్రేమ
ఏ మాయలు తెలియనిది !

అనంతమైన విశ్వం... ప్రేమ
ఏ శోధనకందనిది !!

అత్మ వంచన


లంచం..లంచం
ఇదిలేని చోటే లేదీ రాజ్యంలో
లంచం ఇవ్వడమోతీసుకోవడమో 
లేకుంటే రోజే గడవదీ దేశంలో
ఆసుపత్రిలో ఆఫీసుల్లో
ఆలయాల్లో విద్యాలయాల్లో
ఎక్కడ చూసినా..
అడుగు వేయాలన్నా
వేసిన అడుగు తీయాలన్నా..
లంచమే..


అంతెందుకు?
'అన్నం తినరా' అంటే
'నాకేంటి?' అంట్టున్నాడు అబ్బాయి
పరీక్షలకు చదవవే అంటే
'నాకేమిస్తావు?' అంటుంది అమ్మాయి
ఏదొ ఒకటి ఇస్తేతప్ప
పనిజరిగేలాలేదని
'సరే'ననడం...
మనింట్లోనే మనచేత్తోనే
ఈ విత్తనాన్ని నాటి
పచ్చగా పెరిగేలా చేసి
పోషిస్తున్నది మనం కాదూ!


ఆ మొక్కే మహావృక్షమై
పకలించలేనంతగా
పాతుకుపోవడానికి 
కారకులం మనం కాదూ!


ఎవరికి వారు ఎదుటివారిని
వేలెత్తి చూపుతూ
చేసిందంతా చేస్తూ
'మనదేం తప్పులేదని'
సమర్ధించుకుంటూ
అడుగడుగునా ఆత్మవంచన 
చేసుకుంటున్నది మనం కాదూ!


ఈ మహమ్మారిని హతమార్చడానికి
ఎవరో కాదు..నువ్వూ నేనూ..మనందరం
నోటితో కాదు..
మనసుతో చెయ్యాలి ప్రమాణం!
గొంతుతో కాదు..
గుండెతో చెయ్యాలి నినాదం!!











నా మొట్టమొదటి కార్టూన్


శ్రీఖర కు స్వాగతం


వచ్చేశావా శ్రీఖరా! మళ్లీ అరవయ్యేళ్లకి
విచ్చేశావా శ్రీఖరా!


పోయినసారొచ్చినప్పుడు నువ్వు
చిగురించిన వసంతంలా 
ప్రకృతి శోభకు పరవశమొందుతు
పచ్చని చక్కని పరువంలా కనిపించావు


కానీ..ఇప్పుడేమిటిలా
పత్రహరిత రహిత ప్రపంచంలా
కాలుష్యపు సెగల వేడికి కాలుతూ
కమిలిన రగిలిన కాయంలా కనిపిస్తున్నావు?


మునుపొచ్చినప్పుడు నువ్వు
అరుదెంచిన ఆమనిలా
కోయిల పాటకు వంతపాడుతూ
కమ్మని తీయని గాత్రంలా అనిపించావు


కానీ..ఇప్పుడేమిటిలా
రణగొణ ధ్వనుల రణరంగంలా
కర్ణకఠోర శబ్ద ధాటికి చింతిస్తూ
నిస్తేజ నిర్జీవ గేయంలా అనిపిస్తున్నావు?


ముందొచ్చినప్పుడు నువ్వు
ఉదయించిన భానుడిలా
ఊహల రెక్కల కిరణాలొసగుతు
ఉరుకుతు దూకుతు ఉల్లాసంగా అరుదెంచావు


కానీ ఇప్పుడేమిటిలా
కృత్రిమ చేతల కల్మష లోకంలా
యాంత్రిక జీవన వలయాన తిరుగుతు
నిక్కుతు నీల్గుతు నీరసంగ అగుపిస్తున్నావు?


లాభం లేదు..నువ్వీదుస్థితిలోనే ఉంటే
సౌఖ్యం లేదు..నీ ఈ పరిస్థితి ఇలాగే ఉంటే
అందుకే..
నీ కోసం మేమంతా ఒక్కటై శ్రమిస్తాం!
హరిత  భరిత పపంచాన్ని సాధిస్తాం!
శ్రావ్య ధ్వనుల సామ్రాజ్యాన్ని సృష్టిస్తాం!
నిష్కల్మష నవీన లోకం నిర్మిస్తాం!!
                             

ఉగాది పేరంటం


 ఇది ధరణి ఇంట పేరంటం
ఉగాది పండగ పేరంటం


తూరుపు దిక్కున తెలతెల వారగ
పచ్చని పచ్చిక కళ్లాపి జల్లగ
తెల్లని మల్లెలు ముగ్గులు వేయగ
వెల్లి విరిసెను..ధరణి వాకిలి


రవి కిరణాలే పసుపు అద్దగ
సూర్యబింబమే కుంకుమ దిద్దగ
మావితోటలే తోరణాలుగా
ముస్తాబయ్యెను..ధరణి ముంగిలి


వసంత ఋతువే బయలుదేరగా
శుకములు పికములు కవితలు చెప్పగ
కోకిల కమ్మగ పాటలు పాడగ
సెలయేటిగలగల వాయిద్యాలుగ
జాతర అయ్యెను..ధరణి లోగిలి


వనదేవతలే పేరంటాళ్లుగ
కొత్తపంటల తాంబూలమివ్వగ
పచ్చని ప్రకృతి సారధ్యములో
ఉగాది లక్ష్మికి హారతులివ్వగ
వేడుక ముగిసెను ముచ్చటగా

వికృతికి వీడ్కోలు


వికృతీ వెళ్లిపోతున్నావా
పనైందికదాని పారిపోతున్నావా?


నువ్వెళ్లేటపుడు నీకేదైనా
చూపిద్దామనుకున్నా
ఏమున్నాయిక్కడ?
సునామీ ప్రళయానికి బలై
సుష్కించిన ప్రకృతి తప్ప!


నువ్వెళ్లేటపుడు నీకేదైనా
చెబుదామనుకున్నా
ఏమని చెప్పను?
గొంతుకోతకు గురై
ప్రాణాలు విడిచిన
అక్కచెళ్లెళ్ల దీన గాధలు తప్ప!


నువ్వెళ్లేటపుడు నీకేదైనా
వినిపిద్దామనుకున్నా
ఏముంది నీవు వినడానికి?
ఆకలి చావుకు గురై
అసువులు బాసిన
అన్నదాతల ఆత్మ ఘోషలు తప్ప!


నువ్వెళ్లేటపుడు నిన్నేదైనా
అడగాలనుకున్నా
ఏమిస్తావు నువ్వు మాత్రం?
"శ్రీఖర వస్తాడు
అడిగి తీసుకో" అని అనడం తప్ప!





ప్రకృతి-వికృతి




ప్రేమ వాత్సల్యం
అభిమానం అనురాగం
ఆప్యాయతా ఆత్మీయతా
కరుణా దయ..వంటి
ఆభరణాలు కూర్చుకుని
ఉన్నావు కదా
అందమైన ప్రకృతిలా!


మారతానంటావెందుకు?
అసూయ ధ్వేషం
కోపం తాపం
విరోధం విద్రోహం
దురాశా దుర్భాషణ..వంటి
ఆయుధాలు చేర్చుకుని
వికృతమైన ఆకృతిలా!

ఆమె-సార్ధకత



















పెళ్లిచూపుల్లో అందరిముందూ
నీ సమ్మతి తెలిపాక, వెళుతూ వెళుతూ
'ఇక మన మనసులు రెండు కావు ఒకటే' అనేలా
తన మెరిసే కళ్లలూఅకి నువు మురిపెంగా చూసినపుడు
...ఆమె మురిసిపోయింది


మంగళ వాద్యాల మధ్య
ఆమె మెడలో మూడు ముళ్లు వేశాక
మనసా వాచా కర్మణా
'ఇక మన జీవితాలు రెండు కావు ఒకటే' అనేలా
తన సంశయ నయనాల్లోకి నువు నమ్మకంగా చూసినపుడు
...ఆమె తృప్తిపడింది


ముత్తైదువుల కిలకిలనవ్వుల మధ్య
నీ గదిలోకి నెట్టివేయబడ్డాక
ఆమె చుబుకం పైకెత్తి
'ఇక మన తనువులు రెండు కావు ఒకటే' అనేలా
నువు ఆమె అరమోడ్పు కళ్లల్లోకి ఆర్తిగా చూసినపుడు
...ఆమె సిగ్గుమొగ్గయింది


నీ స్పర్శ తగిలిఇన చోటల్లా
సుమ సౌరభాలు పూయగా
ఆ కమ్మని గుభాలింపులో తన్మయురాలై
'ఇక ఈ జన్మ నాది కాదు నీది' అని
నీలో విలీనమయినపుడు
..ఆమె ధన్యురాలయింది


నీ కలలు తాను కని
నీ వ్యధలు తనవనుకుని
నీలో సగమై నీకనుగుణమై
నీ జీవానికి ప్రాణం పోసి
'ఇక మన ఆశలు రెండు కావు ఒకటే' అని
నిన్ను సమర్ధుడిని చేసినపుడు
...ఆమె సార్ధకురాలయింది







            


అమ్మా! నా అమ్మ కాని అమ్మా!


















అమ్మ అన్న మాట కమ్మనైనదన్నారే
అమ్మ అని నోరారా పిలిచే భాగ్యం,
మరి నాకు లేకుండా చేశావేమమ్మా?


పువ్వు కన్న సున్నితం ఆడదాని మనసన్నారే!
మొగ్గ లోనే చిదిమివేసి నేలరాసేసే,
కాఠిన్యత మరి నీకు ఎలా నచ్చిందమ్మా?


మాతృత్వం స్త్రీకి ఒక వరం అన్నారే!
నీ కర్కశత్వపు రక్కసికి నను బలిచేసి
నన్ను చంపి నువ్వెలా బతికున్నావమ్మా!


నీ పొత్తిళ్లలో ఒదిగి నీ కౌగిలిలో కరిగి
నీ చనుపాలతో సేదదీరి జీవించాలనుకున్నా
మరి నాకు జీవితమే లేకుండా చేశావేమమ్మా?


చల్లగా మెత్తగా స్వర్గంలో ఉన్నాననుకున్నా!
అంతలోనే సలసలకాగే నరకంలా మార్చి నన్ను
విఛ్ఛిన్నం చేసే అగ్నినెందుకు పంపించావమ్మా?


నీవు కలిగించిన విస్ఫోటంలో
ఏం జరిగిందో తెలుసా?
అప్పుడే రెక్కలు విప్పుకుంటున్న నా 
చేతులు తున్నాతునకలై పోయాయి!
అపుడప్పుడే ఊహ తెలుస్తున్న నా
తల వేయి చెక్కలైపోయింది!!


ఎందుకిలా చేశావమ్మా!
నా అమ్మ కాని అమ్మా!

                              

స్నేహ పిపాసి


 







ఓ స్నేహ పిపాసీ..శ్రధ్దగా విను

నీ స్నేహం అతనికి సంతోషమట
నువు మౌనంగా ఉంటే అతనికి వేదనయట

నీ అందం అతనికి అబ్బురమట
నువు ఆనందిస్తే అతడు తబ్బిబ్బవుతాడట

నీ దృశ్యం అతనికి సంబరమట
నువు అదృశ్యమయితే అతడు కలవరపడతాడట

నీ ప్రగతి అతనికి పండగయట
నువు ప్రశంశించబడితే అతడు పరవశుడౌతాడట

నీ ప్రేమ అతనికి అపురూపమట
నీ మృత్యువు అతనికి పీడకలయట

ఎవరాతడు?
ఎక్కడ ఆతని ఉనికి?

నీ అంతరాంతరంగంలో, అంతరాంతరాల్లో
దాగున్న నువు కోరుకున్న....
నీ..స్నేహితుడు                              

నువ్వు-నేను










మహా గంభీర పర్వతం
అచంచల విశ్వాసం
నిశ్చల మనస్తత్వం
నిరాడంబర రూపం
నిర్వికార స్వరూపం
నిజం
నువ్వు.. 

గలగలపారే సెలయేరు
పరుగెత్తే స్వభావం 
అనిశ్చిత  గమ్యం 
చంచల చిత్తం
కమనీయ రూపం
కరిగేటి స్వరూపం
కల
నేను..