సహజానందం

సహజానందం

ఇంట్లో అంతా సినిమాకెళ్లారు
ఎప్పుడో తారలాడిన ఆటను
తెరమీద బొమ్మలుగా చూడ్డానికి.
ఇంట్లో ఎందుకని తోటలోకి మార్చా వాలుకుర్చీని.
 
పువ్వుపువ్వునీ ముచ్చటగా పలకరిస్తూ
రెక్కలను పొందిగ్గా కదిలిస్తూ 
నాట్యం చేసె సీతాకోకచిలకలూ

ఆ చెట్టుకు ఈ చెట్టుకు వంతెన వేస్తూ  
ఘుమ్మని రాగాలు తీస్తూ
ఆక్కడొక కాలూ ఇక్కడొక కాలూ  
వేస్తూ తిరిగే గండుతుమ్మెదలూ

అపుడపుడూ నిర్భయంగా పరిగెత్తుకొచ్చి వాలి
ఏదోటి ముక్కున దక్కించుకున్నాక
భయంగా తుర్రున పారిపోయే జంటపిట్టలూ

నాకు చూపించాయి ఓ అద్భుతమైన సినిమా
ఆహ్లాదకరమైన, సహజమైన సినిమా !