హితము

తొంబైతొమ్మిదిసార్లు వేసుకున్న ప్రశ్న
నీకేమి ఉన్నదని
సమాధానం వస్తుంది
ఏమీలేదనే
ఒక్కసారి నిన్ను నువ్వు అడిగితే
ఏమి లేదని నీకు
ఇస్తుందొక జవాబు
నువ్వే నమ్మలేవు తెలిసాక
లేనిదేది లేదంటే

విషాదం గట్టకట్టిన నీరులాంటిది
పైపైనే తెలుస్తుంది
కరిగిపోయే కాలమొస్తే
మిగిలున్నదంత సంతోష ప్రవాహమే
నువు చెయ్యాల్సినదేమీ లేదు
అందాకా నిన్ను నీవు నిలబెట్టడమే

ఒక్క క్షణం దుఃఖం
మరు నిముషమె ఆనందం
దుఃఖమంటె ఏమున్నది
సుఖానికి సుఖానికి మధ్య విరామమే కదా
కలతపడిన క్షణమందున
హితముచెప్పు ఎవరైనా
స్నేహితుడే నీకన్నది విదితమే కదా